Kapitel 2
Input-output tabeli
Input-output tabelip nioqqutissat aningaasaqarnermi ingerlaarneri takutippaa
Inuiaqatigiit tunisassiornerisa isikkuannik aamma nioqqutissanik kiffartuussinernillu atuinerannik sukumiisunik input-output tabeli imaqarpoq. Input-output tabelimi takuneqarsinnaapput, inuussutissarsiorfiit nioqqutissanik inuussutissarsiorfinnit sorlernit pisarnersut aamma kiffartuunneqartarnersut, taamatuttaaq nioqqutissanik eqqussuinermi inuussutissarsiorfiit nioqqutissanik inuussutissarsiorfinnit sunit pisarnersut aamma kiffartuunneqartarnersut. Atuinermi aamma aningaasaliinerni nioqqutissanillu eqqussuinermi inuussutissarsiutinit sorlernit pissarsisarnersut qanorlu nioqqutissat atorneqartarnersut takuneqarsinnaavoq.
Nioqqutissat ingerlaarnerat
Titartakkami ataaniittumi nioqqutissat aningaasaqarnermi qanoq ingerlaartarnerat ersersinneqarpoq. Karsimi tunisassiorneq-mi inuussutissarsiutit sisamaapput. Inuussutissarsiortut tunisassiornerminni nioqqutissanik assigiinngitsunik aamma kiffartuussinernik pisarput, taakku inuussutissarsiortunit allanit aamma eqqussuinikkut pissarsiarineqartarput. Nioqqutissat taakku nioqqutissatut allatut aamma kiffartuussinertut suliarineqartarput, taakkulu inuussutissarsiortunut allanut ingerlateqqinneqartarput, atortussatut imaluunniit nioqqutissatut, tassa atugassatut, aningaasaliissutitut imaluunniit avammut tunisassatut.
Titartagaq 1. Nioqqutissat ingerlaarnerat
Tabel 1-imi takuneqarsinnaavoq Kalaallit Nunaata aningaasaqarnerata input-output tabeliliarineqarnera inuussutissarsiorfiit 11x11-usut tunngavigalugit aamma sisamanut atorneqarnerat (takuuk kapitali 6). Naatsorsueqqissaartarfiup nittartagaanut sukumiinerusumik suliaq, inuussutissarsiorfiit 34x34-sut aallaavigalugit suliat takuneqarsinnaapput.
Input
Tabelimi sanimut tulleriaani takuneqarsinnaapput kalaallit tunisassiorneranni, eqqussuinermi aamma inuussutissiarsiorfinni akileraarutit tapiissutit ilanngaatigereerlugit atuiffiusullu input-imi inissisimanerat. Tabelimi aamma takuneqarsinnaapput; naleqarnerulersitsineq, tassunga ilaallutik suliffeqarfinni assigiinngitsuni akileraarutit, akissarsisitsinerit aamma tunisassiornermi sinneqartoorutit. Tabelimi takuneqarsinnaavoq pilersuineq katillugu 38.761 mio. kr.-iusoq, inuussutissarsiortut tunisassiornerat 29.915 mio. kr.-iusoq, nioqqutinut akileraarutit tapiissutit ilanngaatigereerneranni 662 mio. kr.-iusut. Taakku saniatigut nioqqutissat tikisinneqarsimasut aamma kiffartuussinerit avataanit pisaneersut 8.214 mio. kr.-inik naleqarsimapput. Kapitali 6-imi tunisassiornerit inuussutissarsiutinut immikkoortitersimapput.
Tabeli 1-imi sanimut tulleriiaat siullianni takuneqarsinnaavoq inuussutissarsiummit Aalisarneq aamma piniarneq-mit1.175 mio. kr.-it kalaallit tunisassiaannut, kiffartuussinerannut taavalu eqqussukkanut atorneqarsimasut. Inuussutissarsiutip 3.355 mio. kr.–inik naleqarnerulersitsinera tabel 1-imi tulleriiaani allermi takuneqarsinnaavoq, taakkunannga nioqqutit aamma kiffartuussinerit 1.175 mio. kr.-inik nalillit input-imit tamarmiusumit 4.530 mio. kr.-iusumit peerneqarsimapput. Taakkunannga -3 mio.kr.-it tunisassiornermut akileraarutinut allanut atorneqarsimapput, 1.125 mio. kr.-it sulisunut akissarsisitsinernut, sinneri katillugit 2.234 mio. kr.-iusut tunisassiornermi sinneqartoorutit isertitallu allat. Inuussutissarsiut Aalisarneq piniarnerlu 2016-imi 4.530 mio. kr.-inik nalilinnik tunisassiorsimapput.
Output
Tabeli 1-imi ammut tulleriiaani takutinneqarpoq pilersuinerup, tassalu kalaallit nammineq tunisassiornerat, avataaniit nioqqutissanik kiffartuussinernillu tikisitsineq taavalu tunisassiornermut akileraarutit, taakku qanoq atorneqartarnerat ukununnga agguarlugu; inuussutissarsiutit tunisassiornerminni atuinerat, inuinnaat pisortallu atuinerat, aningaasaliinernut imaluunniit avammut tunisinermut.
Ammut tulleriiaani siullermi takutinneqarpoq inuussutissarsiutip Aalisarneq piniarnerlu tunisassiai qanoq atorneqarnersut, ilaatigut 1.222 mio. kr.-nit inuussutissarsiutit allanit tunisassiareqqitassanngorlugit atorneqarput, 20 mio. kr.-it inuussutissarsiummut namminermut pisimapput, 981 mio. kr.-it Atortussiorneq, 148 mio. kr.-it Pisortaqarfinnut inunnullu kiffartuussineq-nut. Inuussutissarsiummit Aalisarneq aamma piniarneq-meersut 240 mio. kr.-it inuinnaat atorsimavaat avammullu tunisinermut 3.068 mio. kr.-it atorneqarsimallutik. Aalisarneq aamma piniarneq-mi tunisassiat nalingat tamakkiisoq 4.530 mio. kr.-iuvoq.